Xakechem Zunvem (Vegetable Island)
Pavsachea kallant ami bhitor sorleanv. Soglleak chodd bebeancho avaz. Junhachea mhoineant amkam ekdom chodd pavs zhoddlo. Amchea xetani pitt’ttov, sangttam (cat fish) bhitor sorlim. Kaim lokan him gabollechim sangttam urchin khal’lim. Konge kaddpak zaito lok xetant dixtti poddlo. Kaim zannani aplim xetam nangorlim. Thoddim amchim bhav-bhoinnam amchea ganvant xetam roitat hem polloun khos bhogta.
Soglleanim ap-aplim xetam roilolim zalear ekdom borem zavpachem. Amchem Zunvem “Ilha Verde” odhik sundor ani hirvem dispachem. Amchem Zunvem xakechem Zunvem (vegetable island) mhunn vollkhotat. Lok tore-torecho bhaji-palo roitalo.
Zunvemche bhendde adim famad asle. Hea khatir Zunvemkarank bhendde mhunntat. Jackson Dias aplea eka gitant hea Sant Istev Zunveachem borem vornnon korta. Amkam kitli zomin asa torui ami ti padd dovorlea. Lokanim ap-aplea lhan-lhan porsani bhaji-palo roilolo zalear ekdom borem zavpachem. Ani amchem Zunvem xakechem Zunvem mhunn sid’dh korpache. Amchea Goeant zaitim amchim xetkar bhav-bhoinnam rostea bazuk ravun tore-torecheo apleo utpadona viklolim amkam distat. Verna, Agxe mha-margacher amkam amcho Goencho lok aplea extant zal’lem utpon viktat. Sorkaran apnnak him sompeponnam dil’lean xetkar oslim utpona korunk fudde sorla.
Vhoddlea Goeam kaim xetkaram aplim xetam dor vorsa serkarachea adharan tore-torechem xetant utpon haddta. Eklo xetkar, zachim choddxim ghorchim London geleant, to Goeant ravun xetkamot korta. To mhunnta, “Zomin zaun asa ek bank, zuim ami roilear amkam interest vo foll koso zaitem utpadon ieta ani Dev hem funkott dita. Tum ek bim zomnint ghal vo roi, zomin tuka zaitim biam vo follam dita. Ami fokot thodde proitn korunk zai. Ani tacho foll mhunnlear pikavoll, ji polloun khuxealkai mellta ani jiv dhados zata.” Amcheai ganvant kaim bhav asat te xetacho vavr kortat, bhendde roitat. Tankam amchi xebaski. Dusreani tanchi dekh gheunchi.
Amche bholaikek torkari vo xak (vegetables) ekdom gorjechi. Amchea jevnnank ami zaite torecheo torkari vapuddtanv. Chodd xeo torkari amkam Belganv sakun ietat ani mharog. Amchea Goeant ami torkari utpon kel’leo zalear amkam taji ani sovai torkari mellpachi. Belganv sakun ietolea torkarinim “pesticides” astat ani tem bholaikek vaitt.
Mhojim porbim amchea tornatteank, Junhachea mhoineant “São João” he amche poromporik porbechea nimtan, Gonvllik Sobhechea sohokaran “Novea Kazareancho Dis” monoilo. Hea disa ganvchea loka modem bhavponn ani khuxealkaiechem vatavoronn disun ailem. Novea kazareani ekamekak sodanch visvaxi ravun khorem ani borem Kristi kuttumb ghoddun haddchem mhunn amchem magnnem.
Hea mhoineant ami Sam Joaquim ani Ana-hanche porbe nimtan amchea xapai-xamaincho dis monoiteleanv. Tea disa amchea purvozancho ami mogan ugddas koruiea. Ani tannim amkam sambhallun ani rakhun dovorlolem Zunvem (Hirvem ani Xakechem Zunvem) sambhallunk ami vavruiea.
Tumche gonvlli,
Pri. Eusico Pereira ani Pri. Alexandre Fernandes
Comments
Post a Comment